Ogni volta ca piovéa, la Superiora del Convento de San Giuseppe, Madre Angelina la ghe telefonava a Piero ch’el vegnésse a justàre el cuerto del Convento parché l’acqua la vegnéa drento e la faséa disastri.
Piero el jera un omo de tuto fare: lu el podéa justàre tuto quelo che la maioranza de le parsone no podéa fare, anca parché no le gavéa i atrizi giusti ca ghe voléa par fare i mistieri; el jera bravo e anca onesto, sul costo. Par questo tuti i lo ciamàva quando ca ghe sucedéa qualche disastro.
La Superiora Madre Agelina La ghe diséa senpre: el vegna presto, salo, parché sa dovesse piovare ‘ncora, l’acqua la faría tanto piú dano.
in do xelo el dano Madre?
L’acqua no la vién drento da ‘ndove che la vegnéa l’altra volta, lu el ga fato un bel laoro, stavolta la vién da l’altra parte.
Cussí Piero par diese ani el justàva el querto del Convento.
Un dí distà, dopo un forte tenporale. la Superiora del Convento, Madre Angelina la ghe telefona a Piero.
Bon giorno, són la Superiora del Convento, posso parlare col Sior Piero?
Me dipiase Superiora ma el Sior Piero el xe ‘ndà in vacanssa par un par de stimane, mi a son so fiolo Giacomino e se ela la me dise de cossa che la gà de bisogno mi posso iutarla.
A go acqua ca vién drento in camara da leto. A xe senpre vegnesto so popà a metare aposto e l’altra volta el ga fato un bel laoro. Pensalo sior Giacomino de podér fare un bel laoro anca elo?
De sicuro,Madre, ghe garantisso che anca mi faró un bel laoro.
Un par de misi dopo a vien na piova forte, Xe passàa tri giorni e la Superipra no la gà telefoná. Alora el Sior Piero ei ghe domanda a so fiolo Giacomino:
Dime Giacomino, durante el tempo ca son stà in vacanssa te ga telefonà
la Superiora del Convento?
Si popà la me gà dito cha pioveva drento la camara da leto e mi son ‘ndà a giustarla ,
‘A vedo ca te ghee giustà ben el coerto.
Si popà.Ti te me ghe insegnà che quando se fà un laoro, bisogna farlo ben.
Si ma ti no te ghé capío gnente, a xe diese ani che mi a magno con chel cuerto .
E cossa fasevito Popà?
A serava chel buso e ghin verzeaa nontro da l’altra parte.
NOTA:
Il racconto ha vinto il primo premio “RAISE POLESANE”, ad Arquá Polesine ROVIGO
Scrivi commento