Nono, ti te si sempre stà un omo forte e robusto e no te dimostri i otanta e passa ani ca te ghè. Tuti i te dà dai sessanta ai sesanta zinque ani al massimo. Cossa te xe sucesso alora, che co te si rivà a Venessia i gà dovèsto portàrte all’ospedale?
Tasi nevodo, no sò ‘ndove ca gò da scumiziare. Te dirò solo che’l xe stà el più bruto viajo ca gò fato in te la me vita; a sòn stà cussi male che mai prima in te i me quarantasete viaji fati in giro par el mondo, me jera capità. Tute le volte ca’ndava in aeroplano no gò mai vudo problemi par dormire, stavolta, inveze, no gò podèsto saràre un ocio; e po me sentiva un malessare par tuto el corpo e me se gonfiava i pie come un balòn che a poco a poco i scumiziava a deventàre de un colore paonazo (bluastro).
Dopo 24 ore, che a mi me parea ca fusse pasà più de 40 ore, finalmente, l’aeroplano xe rivà a Venessia. Apena fora da l’aereo, gò scumizià a caminàre, ma le me gambe no le me portàva più. Me sòn sforzà e par fare i zento metri par rivàre ‘ndove ca ghe jera le valise, gò dovèsto fermarme più de diese volte. Co sòn rivà soto la scaleta no ghe la gò più fata, me sòn tacà a la ringhiera de la scala e gò ciamà aiuto. Tuti i passàva, i vardàva e i tiràva drito. Par fortuna du zovanoti i me gà domandà sa gavèsse bisogno de qualcòssa. Digo: si! no posso più caminàre e vuría un poca de acua. In manco de diese secùndi, uno de luri el xè rivà co na butilia de acua e chel’altro xe rivà con un polizioto. El me gà domandà se a ghe gera qualchedùn ca me spetàva. Digo sí, dovaría essarghe me fradelo Luigi e me nevodo Adriano. Gnanca un minuto dopo xe rivà tri infermieri, i me gà messo sul leto a rodele e i me gà portà drento l’infermaria de l’aeroporto.
Mi jero mezo inseminío ma me par de no ver mai perso i sintimenti. I me gà misurà la pressiòn del sangue e la jera solo trentadò. Na infermiera sercàva de farme na puntura, la gà provà vinti volte ma no la podèa catàre na vena. A un zerto punto la ghe dise a chel’altra infermiera: Questo xe morto, nol gà più polso. Mi gò sentío ma no gò podesto rispondare, ma drento de mí go dito: No care signorina, te te sbagli, mi no son gnancora morto.
Con’ambulanza i me gà portà all’ospedale “ DE L’ANGELO ” de Mestre, i me gà messo in camera de cure intensíve e i me gà tegnesto li par 24 ore.
Luigi e Adriano i xe vignèsti a saludàrme, prima de ‘ndàr via, prometendome che i saría vegnèsti ancora el di dopo.
No ocore ca vigní e fare più de zento e vinti kilometri par............
Ti no stà preocuparte, i dise tuti dù, noantri vegnaremoa catarte tuti i dI ca te sarè al’ospedale
Dime nono, cosa gheto provà drento de ti, quando la infermiera la gà dito: ca te jeri morto?
A sta domanda te rispondarò, ma no son sicuro se quelo ca te contarò sia sucesso veramente, opure sel xe stà solo un sogno.
De quelo ca te contarò no ghe gò dito gnente a gnisuni, parchè sa ghe lo conto i pensarà ca son deventà mato.
Contame Nono, ca sòn interessà a savère
Come ca te gò dito prima, me pare de no ver mai perso i sintimenti, però, gnànca de questo posso essare tanto sicùro.
Me parèa de essare ‘ndà drento na sala granda, tanto granda che drento ghe jera più de quindase / vintimila persònede tute le raze, de tuti i culuri e de tute età.
Me sòn incorto che tuti i gavèa na forte luce de drio de luri. Go pensà: Cossa saràla sta luce che luri i gà, che mi a son l’unico ca jera senza?
In fono a la sala, come su un schermo de teatro, se vedèa na luce cussí forte da torte la vista. Sul palco ghe jera tri omini e dedrío de luri gh’in jera altri tri, tuti vestíi de bianco. Se sentiva ‘narmonia de musica e cori che cantàva che te fasèa ‘ndàre in estasi; me parèa de verghe davanti a mi la “Trasfiguraziòn, sul monte Tabor de Gesù, Mosè e Elía, insieme a Pietro, Giacomo e Giovanni. come ca la descrive el Vangelo de San Mateo 17,1-5 e San Marco 9,3
A uno ca jera vizín a mi, ghe domando: Ma ‘ndove semo quà? E cossa sela stà luce che tuti gaví de drio de voaltri?
El me risponde: Semo davanti al Tribunàle del Giudizio de Dio ‘ndove ogni uno de noantri gà da rispondare del ben e del male fato durante la vita, e la luce xe el nostro Angelo custòde che’l ne guida e ne proteje.
Gò pensà: Se tuta stà zente quà gà da essare giudicàda dal Tribunale de Dio, a me tocarà spetàre più de siè misi prima ca riva el me turno par essare giudicà.
Inveze tuti i passàva travèrso l’unica porta ca jera davànti ai giudici e subito dopo ghe jera altre tre porte. Quela a destra la jera la più larga, quela a sinistra la jera un poco più streta e quela de centro la jera la più streta. Subito gò pensà : le tre famose porte; del’Inferno, del Purgatorio e del Parediso. No ghe jera gnisuni ca ghe disesse da che porta che i dovèa ‘ndàre, tuti i savèa da quale porta che i dovèa ’ndàr drento. I passàva cussí presto che me parèa de vedàre le machinete ca conta i schèi in banca.
In poco tenpo xe rivà el me turno. Poco prima de ‘ndàr drento, l’omo sentà al centro del palco el me dise: E ti BeppiJoe ’ndo credito de ‘ndàre?
Me fermo, e come un bauco, vardo senza dire na parola.
Dime BeppiJoe, parcossa no gheto el to Angelo Custode?
( A gavèa capio che quelo el jera San Piero co le ciave del Parediso )
Ghe digo: Veramente, San Piero, mi no gò mai credèsto che el Padre Eterno el ne gabia messo al nostro fianco un Angelo par vardàre e sentire tute le nostre miserie, deboleze, mancanze, cativerie e anca.... San Piero el me interompe e el dise:
Che ti te ghe credi o ca no te ghe credi, el Padre Eterno el ne gà dà a tuti un angelo custòde e Lù el xe responsabile de aiutàre la persona che Lu el ghe gà dà.
Po el se volta verso la so destra el dise: Giacomo, ciama subito l’Angelo de BeppiJoe e dighe ch’el se presenta quà inmediatamente.
In te un batar de ocio se presènta na luce e la se mete de drío de mi.
San Piero el dise: Te gavarè na bela scusa par ver bandonà l’Anima ch’el Padre Eterno te gavèa da in consègna.
Ghe domando scusa, San Piero, xe tuta colpa mia. Vedelo, BeppiJoe, ogni volta chel
‘ ndàva in aeroplano, prima ‘ncore che questo partisse, lu el jera zà indormenzà. Mi ca jera cussí straco, parchè par i ultimi tri misi gò dovèsto laoràre tanto par tegnèrlo in vita, me sòn indormenzà e quando l’aereo xe rivà a Venessia mi no me sòn sveià.
A si, bravo, ma credito de ver fato na bela roba?
No de sicuro, San Piero, e ghe domando ‘ncòra perdono de le me deboleze.
Dime, come xela che BeppiJoe nol ghe crede all’Angelo Custode?
Lu el dise questo co la boca, ma col cuore e co la mente el pensa difarente, parchè ogni matina e ogni serà el recita sempre stà preghiera
“ Angelo di Dio che sei il mio custode, illumina e custodisci, reggi e governa me che a Te fui affidato dalla Pietà Celeste cosí sia.”
Adesso San Piero, savèndo de no essare degno, ghe domàndo un gran piasere.
Cossa vuto adesso?
A vuría chel rimandasse indrío, BeppiJoe, parchè el vièn da l’Australia e la el gà la moiere, oto fioi, disdoto nevudi na pro-nevoda e oto zenari e tanti parènti e amighi.
Come posso mi mandàrlo indrío, a faría na ingiustizia.
El faga come ch’el gà fato l’altra volta
Si, ma l’atra volta jera na roba conpletamente difarente: ghe jera zentanari de persone ca pregàva par lu, i gà fato dire tante Messe, e po ghe jera tanti Santi importanti ca itercedèa par lù; pensa ca ghe iera la Madonna de Monte Berico, San Giuseppe el so protetore, San’ Antonio da Padoa, Santa Eurosia, San Francesco, San Stefano Sant’Antonio Abate protetore dei agriculturi e BeppiJoe el jera un’agricoltore a chei tenpi. A ghe jera anca tuti i Santi protetori de cuei ca pregàva par lù, pensa ca ghe jera anca na Santa Luigina che la jera na so parènte a la longa.
Si lo sò, ma alora tuti savèa chel jera malà, par questo i pregava; stavolta inveze gnisùni savèa gnente e par questo gnisuni gà pregà par lù
Par piasere San Piero el me lo manda indrío par la seconda volta.
San Piero el pensa un pochetín po el dise: Va ben, a te dago zinque minuti par presentàrme un bon motivo par farlo.
In poco tempo l’Angelo el Dise: San Piero penso de verghe el motivo giusto par otegnère la grazia del so aiuto.
Dime!
Go visto che in Paradiso no ghe xe tanti posti restài e gò visto anca ca si drío farne n’antro tanto ma tanto più grande. BeppiJoe el xe grande e grosso e in Paradiso el ciaparia tanto posto, se Lu el lo manda in drío, al so posto, el podaria metarghene almanco tri e se’l vole mi a ghe..... San Piero l’interompe l’angelo e el dise:
Va ben. Si! te ghè rasòn a lo mando indrío par la seconda volta a na condiziòn.
Èl diga pure,San Piero, la condiziòn, mi ghe assicuro che el So desiderio el sarà eseguio.
El gà da ritornàre in tera e perdare tanto peso da podèr ritornare e ciapare el posto ca ghe gavèa preparà par lù sesanta uno ani fà.
**********
Go dito prima che me parèa de no ‘ver mai perso i sensi, però subito dopo che San Piero el gavèa dà la so sentenza, me sòn sveià pensando, drento de mi, che Luigi e Adriano i me gavèa dito che i saría vegnestia a catàrme tuti i giorni, inveze, par mi,jera passà tri di.
Proprio in ch’el momento vièn drento Luigi e so moiere Stefania e Adriano con so mama Livia. Dopo ‘verli saludà a ghe digo: me gavivi dito ca vignívi a catàrme tuti i dí inveze xe passà tri giorni senza farve vedare. Xe sucesso qualcossa? Luigi el dise: Eh...... Beppi.... sonito? Varda che no xe passà tri giorni, come ca te disi ti, noantri jerimo quà ieri, più o manco a stà stessa ora.
Cossa me dito? Mi a sòn convinto ca sia passà tri di. Credame, Beppi, ti te sbagli.
Ben, ghe digo,se ti te disi cussí, mi te credo.
Inveze quando luri i xe’ndà via a ghe domando a quelo ca jera ‘tel leto vizín a mi:
Che giorno xelo oncò, mi sòn convinto ca sia zobia.
No.... no el dise lù, oncò xe marti.
Scrivi commento