La coeònba vecia

 

Da na meda ora bona Toni zher­cava de métarse puìto in testa vita e òpare de Cicerone ché mancava on mese a'a fine de'a scòea, ma 'l pensiero del canpo de madego da tor sù prima de sera, co’ vegnéa casa so pare o anca prima se vegnéa-su tenpo, e l' ocio che tendìa 'e nùvoe mate de majo, no 'o jutava de seguro anca se 'l se ghea refujà studiare in càmara. Ghe manca­va sòeo chel tron-tron de panoce paràe 'torno so 'l soeàro del gra­naro, che prima 'pena lo sentia, ma desso paréa che 'l ghe fesse s-ciopare 'a testa. -Chi saràeo chel maledeto che fa sto casin! El gato no! I gati veci ga altro in testa che dugare co'e panoce! A 'ndarò védare, ah!- In granaro ghe jera sòeo 'a cùbia di'i coeunbi de casa che ghea catà na belconèa co 'a rete despicà e i becoeava 'e panoce de zhincoantin, senzha far tanto bacan, dire 'a verità.

 

 

 

Ma Toni 'l jera cussì inveenà parché no'l podéa studiare in pace ché 'l ga tacà osare come na bestia pa pararli fora. El mas-cio el ga catà suito 'a strada pa scanpare, 'a fémena 'a svoeazhava dosso 'e rete de tute 'e belconèe, ma paréa che 'a fesse apo­sta a schivare coéa verta. Toni dopo 'n tòco, stufo de torghe 'a volta, el ga brincà 'l primo trapèo che ghe ze capità in man: na sea vecia de lanbreta, e 'l ghe 'a ga tirà drio, sicuro de no ciaparla in zòeo parché el ghea senpre bio na mira da s-ciapa. Invesse 'l demonio ghe ga messo i corni: paréa che 'a sea ghesse pena sfrisà 'a coeonba che zoeava drio 'l muro e invesse sta pora bestia 'a ze cadista drita fa on ravo, seca incandìa. -Ma fàea aposta? Fàea finta de èssar morta?- el ga sercà de ilùdarse e invesse, co'l ghe ze 'ndà rente, on fagotèo de pene co 'a testa strocià el ghe ga mostrà coanto zhaltron che 'l jera. -Porco demonio, propio a mi ‘a ghea da capitarme che no go gnanca corajo de tirarghe 'l còeo a on poeastro!- So coéa, sentindo sto rabaltamento, jera rivà de-su so mare. Co a ga visto 'l fato 'a ga tacà braare: -Lazaron, me gheto sassinà 'a mua de coeunbi che ghea da véndare!                          -No go mia fato aposta! E po', cossa garìssito voesto véndare che 'a sarà sta 'ncora coéa che ghe ga portà 'a rama de ulivo a Noè! A no 'a fazéa gnanca pi uvi!                                                                                                                                    -E parcossa crèdito che voesse vèndar­la, bauco! Pòrtea basso che 'a pèo e no sta insangoanarme 'a scàea senò te sniti ti!                                                   Toni el voéa farghe védare che 'l ghea 'l pèo so 'l core, 'lora el ga ciapà 'a coeónba pa na zhata, l' é ndà so'a belconèa e la ga trata basso so'l sèese. Ma ghe paréa de vere 'a freve indosso e, co'1 ga visto el coeónbo che 'o vardava, fermo imòbie so'l colmo de'a barchessa, do s-ciafe so'1 muso 'e ghe garìa fato manco mae.      

 

 

 

                                                                                                          El dì dopo l' é rivà casa da scòea a'e zhìn­coe (dopo meodì ghe jera ginàstica) co na fame che la vedéa, dopo vinti chiometri in bicicreta. In zhima 'a cusina-conomica ghe jera on piato, coerto, de tajadèe sute, menestràe da meodì e inpacàe puìto, ma 'e ze ndàe basso che 'e vis-ciava. So coéa ze rivà drento so mare co na traversà de saea­ta da curare.Toni 'a ga saeudà e po':                       -Ghe ze calcossa altro da magnare?

 

  • Ghe sarìa ‘a  coeonba. ‘A go cusinà lessa.-                                                       -Me pare no la ga mia magnà?-                                                                                  -No. El ghea  mae ‘a testa.-                                                                             

    -E me fradei? Gnanca luri no’a ga magnà?-                                                       -I ga dito che  i jera passùi.-                                                                                                                                - Sarà!- ga pensà Toni, ma ghe paréa de strànio parchè so fradèi garìa magnà anca strope, s'i'e catava cote. Có 'l se ga bio davanti sta brancà de carne, on poco desfà da'a cota, no ghe paréa che 'a ghesse pi gnente a che  fare co'1 rimorso del dì drio e, pa gustàrsea mèjo, co'n bel piato de saeàta, el ga tacà co'a possada dal sorafuso,… ma gnanca 'a segna­va… Da novo: gnente! Maravejà, el ga proà darghe na spironà:…duminti 'l se orba co’l piron ga dato indrio. Lora, tanto pa farse convinto, el ga proà morse­garla: on tòco de coverton!-  Altro che "mae 'a testa" e "passùi"! Coà ga proà sga­gnare tuti prima de mi!-                                                                                                                       -E si che’a go fata bòjare tuta stamattina!-: ga dito so mare come che’a ghe ghesse leto so’l pensiero.                                                                                    –Ma però coà ga proà tuti scatonarla; dime’a verità!-                                            -Si, ze vero, e to pare ga anca dito <dighe che, pa’castigo, el se’a magne lu che la ga copà!>                                                                                                  Senzha pi parlare 1'è partìo ndàrghea portare a'a cagna. Traséndoghea a'a Diana el ga butà l' ocio so‘l colmo de'a bar­chessa. El coeonbo jera là che 'l vardava chissà indove. -Se almanco te criassi, se te fissi coal­che sèsto, almanco savarìa anca mi se te patissi davero o se no t'interessa gnente!- el se ga dito soto-ose. Ghe ga risposto da­drio so pare che 'l ghea assà eà da goernare 'e bestie e 'l vardava:                                                                                                       - Coéo sta eà fin che 'l more inveenà, sensa fémena.                                                                 - Ma no se podarìa mia tòrghine naltra?                                                              - Ti te dòpari i oci massa pa lèdare e massa poco pa capire 'a vita. I coeunbi, cu'i se ga zhernio tra mas-cio e fémena, i resta fedèi finch' ii vive. Altro ch'ii òmani!                                                                                                              -Sarà par coéo che nu'i ga bisogno de tanti maridauri.

==================================================

Scrivi commento

Commenti: 0