Suito che la notisia se ga spaià de che Nanetto l’aveva mansà on caval in puchi giorni e sensa darghe na scuriada, ghe zé capità la vicinansa, in prima e dopo anca gente de i trassiuni vicini, volendo contratar el lavoro del toso incantador de cavai.
-Varda pensava Nanetto co i so botuni. go spacà la testa tante volte cercando on ofissio, come scarparo, sarto, sapassa camin e adesso, vedo che in fine el ofìssio me zé casca in brasso: domador de cavai.
La prima bestia che’l gà ciapà par domar dopo el caval rosso zé stà on mul roano de on vicino confinante co le tere de a Marcolina. Sto mul el gaveva i so tre ani e el ultimo che gà proa montarlo, le stà mena dal giusta ossi co on brasso e due costele a tochi.
El paron del mul ghe gà dito a Nanetto:
-Se te si bom mansar che’l demònio quà, posso dir a tuti che te ghe fato on mircolo, parche, co ti, el gà belche trato a bale alte cinque domaduri.
Nanetto el gà pensa:
-Ostrega, go fin paùra che me go messo te na imbroiada!
Ma, in suma, l’a scomissià a caresar el mul. La prima volta che’l ghe ga messo su na man, el mul ga proa darghe on sgagon. No’l ga morsegà Nanetto, parche questo el gà saltà in banda svelto fà na lepra. L’oran el toso tira fora na branca de milio de a scarsela e el ghe la da al mul. La bestial o ga snasà, el gà alsà le due recione e el ga fato finta che quel magnar no ghe fava mancansa. El progresio zé stà che adesso, almanco no’l ga proa morsegar Nanetto nantra volta.
Nanetto, alora lo gà menà in ombria e ligà soto la naransara. Ghe gà dato àqua, ma lo ga assà sensa magnar. Cossita, te on paro de ore de pansa voda el acetari el milio.
Dito e fato. Dopo tre o quatro ore el mul ga cetà el milio. Im prima, te la prima branca, co le rece longhe; dopo, più confiante, el gà magnà tuo’l milio che Nanetto portava in scarsela, on cinque brancote, al manco.
El mul ga passà la note ligà te a naransara, solo co na mastela de aqua e na brancheta de fien de rampeghina.
A la matina, pien de fame, co’l ga visto Nanetto el ga sgrignà de contento. El gavarà pensà:
-Insieme co quela anima bona, vegnarà anca na branca de magnar.
Nanetto se a vicinà e el ghe gà caressà le grene. El mul, par suito no’l a mia cetà de tanto bom grado ma, quando el toso a meso na mal in scarsela, el mul se gà chietà e el gà magnà la branca de milio bolintiera.
Dopo ghe zé capità on fasso de erba verda. No tanta, parche, co la pansa meda voda el mul mantegnaria la sumission al domador.
Intanto che Nanetto fava colassion, el mul ga magnà el pasto. Nanetto, quela matina el gaveva de ndar al molin a Monte Veneto, masnar formento in tel molin dei cinisi, co’l caval rosso che’l gaveva doma da poco. El gà pensà:
-Meno drio el mul, intanto el fà messisia co’l caval e anca el perde la paùra de le persone.
Co la cavessa curta, lo obrigava a caminar in banda del caval. De tanto in tanto Nanetto slongava na man e lo caressava. Quando el mul vedeva qualcossa: on can, na careta, o sino on bacan stranio, el alsava le rece e el se vicinava al caval, come par cercar protession. Nanetto el gà parlà al mul come fusse stà na persona:
-Chi ga proà domarte vanti de mi, i te ga fato sofrir tanto. Vedo che te si pien de paùra.
Tel molin, Nanetto no ghe a tocà spetar i molinari masnar el formento. I gà pesà la semensa e i ghe a dato cinquanta par cento de farina e cossita, Nanetto se a messo de ritorno a casa.
Tel ritorno, Nanetto gà sentio che’l mul marciava co più confiansa. El se spaurava
manco e el sbaiamento de i can co i passava davanti le case no ghe fava più fatidio.
Quando, però, da distante el a sentio el bacan de la machina de on camignon, el se a fato taco el caval. Nanetto, alora, loa messo entre lu e el baranco. Cossita el mul zé stà chieto fin chel camignon zé passà. Le rece se gà sbassà e el ga scomissià caminar de novo co calma, compagnando el passo verto del caval roso.
Zé stà on grande progressio, parche, suito rivadi casan Nanetto gà ligà el caval insieme al mul par che i magnasse el pasto verdo insieme. Na volta oni tanto Naneto, co on strasso liviano ghe sugava el sudor al mul e assava on tochetin el strasso insima le grene. Dopo insima la schena e cossita, tel giorno drio el mul ga cetà la badana.
Te nantra setimana el gà truca la cavessa par o freno liviano. El pansal zé stà messo sensa tantro strucarlo.
Cossita Nanetto ghe gà fato el calculo che el tempo de doma del mul la saria el dopio del caval, ma, che lo domaria, lo domaria sensa darghe na scuriada.
No zé passa polito due setimana, quando capita nantro freghese, co on cavalin doveno par mansar. El gavrà bio dua ani, se tanto. Nanetto ghe dize al paron:
-Ze ancora doveneto par sela. El gà mia el corpo ncora compio.
-Ma ti te lo mansi stesso che’l sarà doparà par me fioleto de undese ani par ndar a scola.
Adesso, alora, co coela de mansar bestie, la rampegina gà scomissià sofegar el milio.
Nanetto ghe gà toca lavorar de più. A la matina el domava e al dopo mesogiorno, el sapava in colônia, fin che’l sol se trava. Sempre che ndava in colônia, o a qualche altro luogo, menava drio na bestia. Na volta el mul, nantra el cavalin.
Co quele caminade insiemel le bestie fava messisia in presto.
De le volte, Nanetto invesse de milio, se portava drio in scarsela sucro rosso in balocà e el lo donaca a Le bestie, sempre chel podeva.
Quando le gaveva paúra de la badana, el ghen dava on balocheto e alora, come par incano, le acetava la fornimrnta e anca el pansal.
Te on mese, anca el cavalin zera domà e el toseto ndava a scola a caval.
Zé Riva el giorno de montar su el mul. Intanto che Nanetto lo infornia, la nona Pina ghe racomandava:
-Varda, seto, caro. Che i mui gà nome de mui parche i zé mui pròpio; e mul vol dir che zé na na bestia co personalità difarente. Co i mete na idéia in testa, no i la truca gnanca dopo morti.
Meio Che te vai montarlo via te la laora, onde ieri te ghè arà par semenar pasto. Cossita, te a terra mola, se’l scomissia scramussar el se stufa suito e anca se el te tra in terá, no te te fe tanto male.
Nanetto el ga pensà che la racomandassion de la nona la zera piena de sapiensa.
El ga menà el mul in medo la terá arada, le salta a cavaloto. El mul no se ga gnanca movesto. El ghe ga dato on picolo penton co i calcagni in te a pansa par instrarlo.
El mul, come fusse de tanto domà, el se gà messo caminar calmamente par remirassion de tuti che spetava on spetacolo de scramussade.
Nanetto contento, el ndava in drio e in vanti tel cortivo e el mul lo obedia come on cagneto.
La doma co messìssia, gaveva frutificà nantra volta.
Scrivi commento