Uta che pescada e tanto

Nanetto Pipetta

Sergio Angelo Grando – Porto Alegre – RS

Zo in fondo la colònia onde i passava peste, el nono Àngelo l’avea stampà su on ranceto querto de tégole vansae e sarà co tole vece de sbrego. El servia par l’ora de magnar, ma soratuto par salvarse dela piova. La zia l’à giutà el Nene desmontar e l’à tirà zo i sestuni.

Rento te le due cavagne l’à tirà fora el magnar: on pan ncora caldo, meda pessa de formaio, fasoi, riso, taiadele in ùmedo, col tòcio del gal rosso. Da bever, on litro de vin. L’aqua rento te na salera i la gavea ciapada soto on paredon in medo on matesel. La zera tanto làmpeda e freda che fava fin mal i denti.

Dopo magnà, el nono se à butà soto na ombria e cinque menuti dopo el dormia de gusto.

La zia Marieta ga tirà su del rio la nassa fata de strope par ciapar i pessi. Ghen zera rento on trenta: sardele, due bele gioanine grise, nantre quatro pìcole che la zia le à molade co la recomandassion che le cressesse e le vegnesse sbecolar la mignoca l’ano drio. Na gioanina de pansa rossa e anca on barbeto. Nanetto sevitava dir:

– Uta, che pescada!

Intanto che la zia snetava i pissi, Nanetto e el Nene i se à catà on vaseto de mignoche e co due lamiti de sardele i ze ndati pescar zo tel boin, onde el rio fava divisa co Fiorindo dal Molin.

Nanetto l’à ciapà la sapa e trato rento tera tel rio par sporcar l’aqua. I pissi, par istinto, i sa che col aqua tùrbia vien anca bissiti de magnar. Quando i vede i bissiti impirai tel lamo, li brinca co voia e i resta picai. Te na ora, i ghenà ciapà altri tanti che la zia co la nassa.

Co la ga visto la picaia coi pessi in man de Nanetto, contenta la ghe dise:

– Pòrteli qua che li sneto anca questi. Stassera, intanto, la sena ze garantia.

Nanetto à visto el Nene co la fionda in man che molava sfiondade a drito e storto, sensa petarghe rento a gnente. El dise:
– Nene, vedemo cosa ga sta fionda che no te sì bon gnanca sbaletar la caseta.
– Mi ghe smiro polito, ma le sassade va via storte….

Nanetto el ciapa la fionda, mete tel coro on sasseto tondo e smira on oseleto paracariole (i canta come el sgrinciar del asso dea roda de na cariola quando el ze mia onto), el ghe dà na smirada e spoc…Ciapà la sassada giusto tel peto e zo el paracariole sensa vita.

El Nene, co quela braura de Nanetto, el core catar su el passarin. Ma, co lo ga visto morto, el se mete a piander parché ghe ga fato pecà. El à giurà no sfiondar più nessun passarin. El doperaria la fionda sol par tirar a segno.
Nanetto no ghe ga mia fato tanto bado. El ghe ga cavà le pene e dato ala zia Marieta par portarlo casa e rostirlo insieme dei pessi.

El nono Àngelo se à desmissià, el à tirà fora dea scarsela del gilè la scàtola de tabaco. Tirà fora on spessigheto, e l’à snasà. Dopo ze ndato fin tel rio, se à trato su on poca de aqua tea fàcia, se à sugà co na mànega dea camisa. Sensa dir gnente à ciapà la sapa che a zera messa rento tel rio par sgionfar el mànego. Cossita zera più fadiga che la se desmanegasse. La à messa insima la schena e se à instradà verso la piantaion de mìlio.

La zia e Nanetto, sensa dir gnente, cadauno à ciapà la so sapa e i ghe ze ndati drio. Co a zera metà strada la à dito:
– Pupà, volio che vaga tor na salera de aqua fresca?

Sensa voltarse, el nono Àngelo ghe dise:
– Desso nò. Co ne bate la sen, el Nene ne la porta fresca. Se la portemo desso, al ora de béverla la deventa calda come pisso de mul.

El Nene ze restà tel rio dugando coi sassi tundi, fando pìcole rostine de aqua e co la brìtola che’l nono ghe imprestava sempre, fava rodete de molin e dopo le meteva a girar co aqua che’l ghe incavava a dosso.

Co’l sol scomissiava ndar basso, i à molà el laoro. Te na s-cianta i à cargà la careta. I montava su tuti. El nono montà a caval ndava davanti. El Nene parava i boi, e Nanetto e la zia Marieta i cavava le panoce dele gambare de mìlio bon de cosinar; curava e pelava e radise dei radici pissacan par la sena.

Praticamente, cossita zera solo far na polentona che la sena zera bele pronta. Nanetto diseva:
- Voler cossa de meio: panoce, radici pissacan co le radise, polenta, pessi a volontà e formaio! E on bon bussoloto de vin!

Sergio Angelo Grando
Email: sergio.grando@terra.com.br