Santa Bàrbara! Ora pro nobis

Nanetto Pipetta

Sergio Angelo Grando – Porto Alegre – RS

 

Piovea tanto che le poce de aqua le pareva on mar. Le nùvole carghe, negre, piene de s-ciatisi se mantegne sora la casa de Àngelo e compagnia.

Nanetto, la zia Marieta e el nono i ze ndai scartossar e sgranar mìlio par dopo menarlo al molin. I taiava i scartossi co la meio paia par far i pachiti e dopo vénderli par ciapar qualche soldo.

 

Na gossa de aqua à scomissià cascar insima el mùcio de mìlio onde i zera sentai. El nono à messo soto na bassia de rame vècia e tanto storta che la pareva sobrevivente de na guera tómica.

Soto el mìlio, na volta ogni tanto i surdi sgrinsiava e i rossegava le panoce.

El nono à crepà el silénsio:
– Meio che mete su na capa in schena e vaga do tea rossa veder se quel mùcio de formento ze ben querto. Te vien insieme, Nanetto.

Se ocore calcossa te me giuti.

La strada de ndar zo in colònia pareva el Brenta. Tei sulchi fati par le rode dea careta, l’aqua zera tanta, che ghe rivava tei danòci de Nanetto co le braghe fate su.

El nono ndava ben, lu che’l gaveva metesto su i stivai cole trombe longhe, che ghe tocava le culate.

Par sorte, i à visto che’l mùcio de formento continoava querto. Ma, l’aqua zera tanta che le prime faie soto, par via dela infiltrassion, le era ndate a ramengo. Ben, pensava el nono, pitosto de perder tuto….Sia fata la volontà de Dio. Se volta contra Nanetto e lo invita:
– Dà che semo qua, ndemo fin insima la riva veder se el Rio Sapato l’à cressesto.

De sima el monte i à visto, da quelaltra banda del rio, tea riva rente Fiorindo, dopo na grande tronada, na mùcia de paraduni e altra tanta de tera molarse zo verso el rio.
– Santantoni, dise el nono. Ze na bruta de na slavina. Varda, varda, Nanetto, fin bel da veder…
– Vardè el rio, nono Àngelo, el ghe risponde Nanetto. Nantra s-cianta che’l vien su e el mena via la casota e insieme anca el badilon che ghemo metesto rento al querto.

Par tuto a torno, in tuti i munti, onde i oci podeva veder, ghe zera pìcole slavine da partuto. I filiti de aqua i se gaveva transformà en poderose montagne de aqua che se svilupava rento pai pressipìssii, sgionfando le caverne de barro e sassi.

Na bruta saeta ze cascada a meno de sento metri dei due, sverdendo na braghera de angico solitàrio de alto a basso, in meso el potrero.

El nono se à segnà co trè crose: una in testa, nantra tea sbèssola e l’altra tel peto.

Nanetto lo vardava con do oci spalancai dea paura. El nono taca a pregar soto voce:
– Santa Bàrbara, sora i bruti temporai e le saete, ora pro nobis. Dopo, voltàndose a Nanetto:
– Ndemo casa, senò da qua na s-cianta i vien inserca, pensando che ne à tocà qualche desgràssia.

 

Sergio Angelo Grando
Email: sergio.grando@terra.com.br

 

Scrivi commento

Commenti: 0