Nanetto se spaca na gamba

Nanetto Pipetta

Sergio Angelo Grando – Porto Alegre – RS

 

Par suito i pissi no i tirava. I proava meter el lamo soto i sassi, gnente. Te la corentesa parché là ghe ze le gioanine, gnente. Tele vasche, onde ze qualche zondià che va de soto on sasso al altro. Zera solo quele maledete sardelete grande fa on pulde che de tanto pìcole no le se pica tel lamo, ma, le sbecolava tuta la mignoca, assando el lamo lustro.

 

Sti tusi i coreva de un sasso al altro, trucava de posto i lami e, gnente de pissi. Solo qualche sardeleta che, par sorte, i la impirava par la pansa tel ora de tirar su el lamo.

Ma, drioman che’l aqua se inturbiava, vegneva fora de soto i sassi sardelote de palmo. Una drio l’altra. Dele volte, co la medèsima mignoca, dava par ciapàrghene quatro o sinque.

El silénsio se à crepà co le osade de Nanetto:
– Uta! bisso veio. Te ò brincà! Sta sera te meto in gola…

Tuti se ferma de pescar, e i varda cossa ze stato. Nanetto gavea pescà na bela gioaninota e la parava in torno parché tuti la vedesse. Co’l ze ndà par despicarla, la ghe ze cascada rento tea vasca.

Tuti quanti i se à messo rider e a coinarlo:
– Uta, bisso veio! Uta, bisso veio!…

Nanetto ghe ga tocà star chieto, ma el à scomissià machinàrghene una de fresca:
– Ghen peto una, el pensava, che par tanti ani no i se desméntega più.

La piova sevitava vegner do a banduni. El rio ga scomissià ingrossarse. Te la normalità, el Rio Sapato el gaveva meno de diese metri de larghessa e, se tanto, medo metro de fondessa. Qualche vasca la gaveva on metro e meso a due, ma le zera ciare.

Col aqua dei munti ga scomissià rivar, menuto a menuto se vedea che’l rio cresseva. Te na ora el gavea cressesto on metro e no’l dava più passo parché la corentesa zera massa forte. I ga pescà nantro toco de insima el baranco, ma i pessi, passui, no i tirava più tanto. Celeste Marinelo l’osa:
– Gente! no i tira più, ndemo casa?

Nanetto che’l se gavea sentà on poco distante, el pensa:
– Adesso ghe la peto!

El se trà in tera e el scomìssia osar:
– Oi, oi, che mal…Iuteme, son fato mal…Go spacà na gamba…

Tuti à mola le bachete e i ze coristi veder cossa iera sucedesto col toso.
– Gheto fato cosa, Nanetto?
– Go pestà mal e son trato fora el pié. Oi che mal.
– Proa, tìrete su e vedi se te sì bon caminar. Qua che te iuto, ghe dise Gioanin del Moro.

Nanetto se tira su e proa meter zo el pié drito, ma, quando l’à incostà in tera, el ga molà via na pi bruta de na sigada, che li ga spaventai tuti. Gioanin el dise:
– Bisogna che lo portemo suito casa. El nono Angelin che’l ze giusta-ossi el ghe darà na vardada. No podemo mia dimorar massa, senò el pié se sgionfa e lora ze più fadiga méterlo a posto. El toso ze scarmeto. Lo portemo in schena on toco cadauno. Gioanin se ga sbassà e Nanetto ghe à montà in schena e i se mete ritornar a casa. Cossita on tocheto cadauno i à portà el toso malamentre riva insù. El Nene co le bachete e la borsa dei pessi, ze coresto tea paiola ciamar el nono par giustar la gamba del pescatore ferito, che’l pareva da morir.

Quando Nanetto ze stà messo in tera, el ga scomissià caminar svelto e ridéndose come on mul che sgrigna.

Magineve el teatro. Par suito, de colpo, gnensun ga capio. Ma quando quei che lo à portà in schena i se à desmissià fora, Nanetto se la gaveva belche tolta par la più curta.

Quei che zera stati casa e zera vegnisti fora veder la gamba rota del Pipetta, i rideva come mati, più de tuto par veder i stati de quei che Nanetto gavea tolto in giro.

Ma, come no ghe zera altro de far, i ga scomissià rider anca luri.

Quel mesodì, intanto, Nanetto ze ndà disnar zo del zio Toni, nantro fiol del nono Angelin, maridà co la zia Amàbile. El zio Toni gaveva redità meda colònia del nono Angelin che la confinava co la sua.

 

Sergio Angelo Grando
Email: sergio.grando@terra.com.br

 

Scrivi commento

Commenti: 0