Nanetto Ferío

Nanetto Pipetta – Sergio Angelo Grando – Porto Alegre – RS

 

Nanetto, piampianelo, el se tirava vanti verso le tere alte. Co la speransa de catar calche ànima viva. Ndava sguelto come na lumega. Co coela de corer par scapar dei bùlgheri, el gaveva assà indrio i zocoloti. El gaveva macà le sole dei pié e ncora par sora el ghe aveva pestà te na lesca de sasso e questo el gaveva verto on bel taio te on pié, come fusse na tega verta de fasui mori. L’avea scomissià infiamarse.

 

 

Riva note de mèrcore. Sensa camisa e sensa gnente tei pié, son ben ciapà, pensava el toso. Ma dopo l’à pensà che la Providensa Divina no ghe ga mai mancà e el se à dato on fià de coràrio. El à dito soto voce:
- Fede, speransa e carità! El pupà me à sempre insegnà che queste le ze le più bele dele virtù de on cristian, e mi me par de averle tute tre. Fede in Dio e te la bontà del umanità; speransa de catar la cucagna e, anca, on giorno co son su el mio, maridarme co la Gelina e carità…Ben, se spartir quel che go zé carità, son perso, parché no go gnente da spartir. Ma, se calchedun ga fredo, e el me domanda la camisa, mi ghe la dago. Se calchedun ga fame e mi go due patate, ghen dago una… Si, si, de la me maniera, son bon far carità anca mi.

Pena vanti scurir, el cata on trodoleto. El pareva on cariador de ratuni de bagnado. Ma nò, el ze meso grandoto. Fursi el sarà de porchi de mato, pitosto, pensava Nanetto. On rognar de porsei à tirà el Pipetta dei so pensieri. Te on potrereto de grama pelada vegnea na porcheta e, de drio, trè porchiti grandi fa on pulsinel. El ga considerà che i zera mia porchi de mato. I zera porchi de casa, mansi. Me digo che’l paron li tegne molai par che i ndesse catar pignui e balete. Co i ga visto el toso, i se ga voltà e i à disparà riva insu. Nanetto, piampianello, ghe ze ndato in calso. In puchi menuti, el se à catà a meno de sinquanta metri de on lebo de sal par le vache.

El ga vardà in torno, ma no’l ha visto gnente. Però, on menuto dopo, l’à sentio na persona ciamando le vache par méterle in stala:
- To, to, to, tooo…, barosa.
- Santantoni, son salvo, dise Nanetto, e el à fato el segno dea crose e mastegà su on padre nostro ringrassiando la

Providensa Divina. L’era te’l imbrunir.

L’à caminà nantri puchi de menuti, e el à visto on ciareto drio móverse. El à scomissià osar:
- Paruni, paruni, ò de casa?!

On cagneto ghe ze vegnesto incontra, sbaiando. L’à snasà el toso, e l’à scomissià menar la coa. Dopo, el se mete davanti, caminando e vardando indrio come fusse drio dirghe a Nanetto che’l ndasse co lu.

Co’l osamento, el paron ze vegnesto veder chi zera. Co’l à visto quela pora creatura sota, magra, sensa camisa, pié par tera, lo à giutà a caminar e lo à menà a casa.

Intanto che Nanetto tegneva i pié te na mastela de aqua calda con sale, el contava a Gìgio Frison i acontessimenti dele ùltime quaranta oto ore. Robe de gnanca creder.

La dona de Gìgio, la Graciosa, la ga dito:
- Vardemo quel pié sgionfo. El par che te sìpia infensionà.

Dopo na bona zaminada la dise:
- Te è fato on bel sbrego. Bisogna che metemo su na pastela de foie de slavassuni e farina de polenta col sucro. Doman te menemo fin la cità dal dotor Ivo, e lu farà coel che ocore, dise Gìgio.
- Se no ze domandar massa, dopo del desturbo che gavé belche bio comi, gaveo calcossa de meter in pansa? Go tanta de quela fame che magnaria anca i me zocoloti se i gavesse catai.
- Te speti diese menuti che la sena la ze scuasi pronta. Ze solo la polenta cosinarse nantra s-ciantina.

 

Sergio Angelo Grando
Email: sergio.grando@terra.com.br

 

Scrivi commento

Commenti: 0