Nanetto doma on caval mal siapà

Nanetto Pipetta – Sergio Angelo Grando – Porto Alegre – RS

 

El zio Toni l’à comprà on caval dóveno e scarmeto. L’era mal siapà. Magro, peloso, desferà e co na bruta macaura in schena. Lo à batedà col nome de Baio.

Nanetto à savesto dela compra. On giorno, dopo disnar, intanto che i altri riposava, à taià fora pal potrero e te na s-cianta zera zo de Toni.


– Nanetto, cossa feto qua sta ora? No te cati rèchie gnanca dopo magnà? Ghe dise Toni, a tìtolo de saludo.
– Son vegnesto veder el cavalin che gavé comprà, ghe risponde Nanetto.

El zio Toni ghe dise:
– Vàrdelo là, soto el silamon, che’l se impienisse la pansa.
– Co palme de palmiro e sime seche? Quel magnar là no à nessuna sostansa. Cossita nò no’l pol portarve in schena, vu che sì meso grasso e grosso.

Nanetto ghe va a torno, el zamina la bèstia, considera, resmunga e par fine el ghe dise:
– Femo on trato, sior Toni. Asseme el cavalin co mi due misi e mi ve lo lustro fora e ve lo dago manso cofà on gatel.

El zio Toni à considerà che co poco trato el caval continoava fiaco e cossita fiaco, no’l podeva esser montà e sensa esser montà, el podaria deventar bìschero de novo, visto che zera domà da poco. Par fine, el dise:
– Và bene cosita, Nanetto. Par due misi, el caval ze tuo.

Co Nanetto ze rivà casa col caval menà in cavessa, la nona Pina ghe dise:
– Onde veto co quel caval pien de ossi e de piaghe?
– El zio Toni me lo ga dato temporariamente, risponde Nanetto.
– Bela grata, te te è tolto a torno, fenisse la nona.

Te quel medèsimo giorno, quando Nanetto ze ndà laorar se lo ga rastà in colònia insieme. Co na corda longa lo à ligà drio la strada onde zera latui, veriol e tanto, tanto pasto verdo. El cavalin, co’l ga visto tanto pasto fresco, el se ga molà magnar come on desesperà dela fame.

A la sera, co’l ze rivà casa, vanti molarlo tel potrereto, Nanetto, ghe ga passà in schena on pesto de foie de malva, piantàdene e bagna. El nono Angelin ghe ga dito che quel pesto zera on santo remèdio. Cossita, Nanetto fava tuti i giorni cossita. Se menava el caval in colònia e a la sera ghe passava el pesto miracoloso.

Te na setimana el caval gaveva nantra stampa. El caminava co la testa alta. A la sera, co’l zera molà tel potrero, el alsava la côa, el scramussava. Le piaghe zera deromai tute guarie.

Nanetto, na matina, lo ciapa par menarlo in colònia e, par scomissiar, che’l se costumasse de novo cola fornitura, el ghe ga messo in schena on pelegheto cola pele tendra e lo ga ligà col pansal. Cossita, pinpianelo, el caval tornaria a mansarse nantra volta.

In prima, el Baio à alsà le rece. Co’l ga sentio el pansal strénderse el se ga movesto, ma, visto che Nanetto ga strendesto poco, el ze restà chieto.

Cossita, tel finale de due setimane, Nanetto zera montà a caval del Baio, co la testa piena de idee.

 

Sergio Angelo Grando
Email: sergio.grando@terra.com.br

 

Scrivi commento

Commenti: 2
  • #1

    Best Juicer (domenica, 21 aprile 2013 05:03)

    This is an excellent post! Thanks for sharing with us!

  • #2

    canzoniereveneto (lunedì, 10 giugno 2013 12:00)

    Thank you.
    Roberto, amissimondoveneto