Matussel, vuto coparte e méterme in rovina?

Nanetto Pipetta – Sergio Angelo Grando – Porto Alegre – RS

Forsa de ndarghe drio a Génio, Nanetto el ga perso tuta la paura dei camignuni e altre màchine che ndava sensa boi e mule.

Intanto che Génio soferava, Nanetto ghe la contava, ma stava atento co la coa del òcio par veder tuti i moviminti che’l paron del camignon fea.

Zo par la riva, el strucava col pié drito; co’l voleva trucar le marce, el strucava col pié sanco. Cossita, on poco al di, el ga catà su cognossiminti, che ghe parea sufissienti par soferar el bestion.

 Posted by Talian Brasil on 08/06/2011

On giorno, co’l camignon el zera meso vodo, e Génio drio dormir soto na pianta, dopo aver disnà e bevesto on bussoloto gaiardo de vin, Naneto el pensa:

- E se proasse…

Dito e fato: salta su, gira la ciave, struca on boton, e on strèpito se ga fato sentir.

Co Génio el se ga desmissià par via del rudamento del motor, zera tardi. Nanetto se gavea instradà col camignon, securo che´l podeva dàrghene fora.

Fato più de cento metri sensa trucar la màrcia, el ga pensà:

- Par incoi intanto basta, parché se’l se invia pròpio corer, no son mia seguro de tégnerlo in strada.

El volta la diression par ritornar, ma la strada la ze tanto streta, che suito el se ga catà fàcia-a-fàcia co on barancheto de sasso vivo e, par poco, no lo ga scornà coi ferai del camignon.

Si, ma desso fasso cossa, pensava Nanetto, se no go mia ncora imparà de ndar indrio cul!?

El ga mal e mal fato ora smorsar la màchina, quando ze capità Génio, rosso come on gàmbaro rostio de tanto cativo che’l zera:

- Cossa feto, matussel, vuto coparte e méterme in rovina? Seto mia che se te pianti via na smoltonada su par i sassi te pol rovinarme el camignon e anca farte mal i sarvei? Imbecile, sensa giodìssio, de un lasaron…

In fine, de quel di in vanti, Génio no ndava gnanca pissar se no´l se portava drio la ciave del camignon.

Sergio Angelo Grando
Email: sergio.grando@terra.com.br