Sergio Angelo Grando – Porto Alegre – RS
Seste e sestuni prunti, le giornade te la strada compie. La strada ze restada come na variante. Te le rive più forte i à menà na mùcia de slitade de batingon, mescolà co on poco de scoio fato a martelae. Te serti posti, co zera impossìvole che la batinga se tegnesse, par via dela riva esser massa granda, i fava on tocheto de saliso. El saliso zera fato de sassi
grossoti come na ingùria, co pelo meno na faciada piana. Cossita, metesti zo uno tacà l’altro e impienio le sfese co altri sassiti più cei e tera, la strada se tegnea polito e la piova no fava busi. L’ùnico inconveniente zera, el lìsipo dei sassi. Co piovea, i boi, col peso dela careta, no i podeva piantar le onge in tera, e firmarse polito. Dele volte i sbrissiava e i cascava in danocion.
Alora, fenio tuti i lauri, i se inventa de ndar pescar te’l rio Retiro. Làrio e Nanetto i ga catà le bachete e fato i lami e Tito à providensià le mignoche. Tante e bele, parché le se mantegnesse vive, par via che, co le zera messe te’l aqua, le se movesse gran tanto e alora i pessi le ciapava de gusto e per quel ato i restava picai te’l lamo.
Zo par na strada storta come l’ànima de Pónsio Pilato, na ora dopo e on trenta sbrissiuni e tante altre tómbole, i ze rivai zo te’l salto dela usina.
Nanetto davanti, de passo verto, testa alsada, viso seren, come on Àtila comandando e destrugendo tuto col so pestar: sielde, picuni, rosete, erbe dure… Desso, po, che’l gaveva comprà on paro de prussiani!
I tre pescatori gavea destinà rivar rente sera te’l rio, par pescar intorno la vasca dea usina durante tuta la note. De note vien fora dei busi i grandi pessuni: jundià, pintadi e traire. Pena rivai, ncora co on fià de ciaro, i se cata on posto par passar la note sentai, e anca i podesse becolar su calcossa del marendin che i se gavea portà drio. Te’l imbrunir, on samo de moscatei i se ga trato a dosso. Par salvarse i se ga cucià rento l’aqua, solo cola testa de fora. I saveva che i moschiti i taca te’l ora de ndar do el sol. Dopo i se chieta e no incomoda più durante tuta la note. Così à sucedesto.
El ciaro moribondo del feraleto a petròlio luminava fiacamente i tre, come i fusse ànime del altro mondo, fando, de bacheta in pugno, guàrdia a la note scura. Atenti al tiron dei pessi, el tempo passava presto. Che bel luogo, pensava Nanetto. Tuto chieto. Solo el bacan del aqua che casca…In torno, tuto circondà de boschi sentenari. Se podaria dir, sensa paura, che se’l paradiso fusse cossita, el saria on bel gusto anca morir.
Ga scomissià la piova co zera matina, te’l primo cantar dei gai. Zera ora de
fiocàrsela, ma, co ga scomissià la piova, i pessi i ga scomissià a tirar come desperai. Uno drio l’altro. Nanetto el ghe dise ai tusi de Gìgio:
- Bagnai par bagnai, se stemo nantra ora ghen ciapemo on fùlmine.
I ghenà ciapà depiù te meda ora a la matina, che durante tuta la note; e de note i ghenà ciapà più de diese chili, gaiardi, dopo niti!
Sergio Angelo Grando
Email: sergio.grando@terra.com.br
Scrivi commento