I simioti ghe dà el truco del spauron che i ga ciapà

Nanetto Pipetta - Sergio Angelo Grando – Porto Alegre – RS

 

Nanetto, col stómego vodo, el à saltà la note intiera de un insònio al altro. I più tenebrusi l’era coei concatenadi col magnar. Tole piene de magnari buni. Polastri rosti, sorasco co tre dei de grasso, sobremese de pèrseghi in calda, buli, dolsi de pasta. Ma, sempre che’l se vicinava par magnar, sussedea qualche sinistro. Na volta ze capità na mùcia de bùlgheri, e i ga magnà fora tuto, vanti che’l podesse dir on amen. Nantra volta, on mùcio de magnar sora na tola in ombria, càpita na giunta de boi in disparada menando na slita. I coreva tanto, che sta slita la zolava quatro dei sora tera. I boi no i à podesto desviar dela tola e i ga trato tuto a bale alte. Par ùltimo, el se à insonià che, quando el zera drio rivar a taco del magnar, na pi bruta brentana de aqua ga lavà via magnar, tola e tuto. On

 

 Posted by Talian Brasil on 05/06/2011

vero dilùvio par farse capir meio. L’è stà sensa magnar nantra olta e pedo ncora bagnà come on polsinel. El ga scomissià sentir tanto fredo e tremar come na foia al vento.

Te quela, el toso se desmìssia spaventà.

S-ciarava el di, co promessa de tempo bon. El se à palpà de alto a basso e el à visto che’l zera co la schena, le culate e anca in meso e gambe tuto moio. El primo pensiero che ghe ze vegnesto in testa:
- Santantoni, la go fata in braghe. Ma, dopo na zaminada co più profondità l’à visto che’l solaro dela caverna zera tuto moio. Ben, manco male, el à pensà. Almanco no spussarò de pisso! Sò nca mi che son insonià co magnar e fredo. Santa Maria, che fame! Che fredo!

El se à rampegà fora del so cùcio e l’à vardà involta. El dise:
- Ben, par intanto tiro zo la roba, ghe dago na intorciada e la meto su pa un ramo. Co vien fora el sole la se seca.

L’à tirà zo la camisa, dopo le braghe, ma co le rivà te le mudande el ga pensà. Coeste nò. No se sà mai se càpita qualcheduni. Te quel el scolta, poco distante on osamento, sighi, sgorlamento de rami. El varda meio, e el vede do simioti.

Co on simieto cadauno. In calso on simio più grando che’l pareva voler robar i pìcoli. Nanetto se ga inrabià, el ga scomissià osar:
- Va te ciava, demònio d’on sìmio, te là fè fàcile parché no go on s-ciopo, senò te vedarissi co quante steche se fa on portel, bruto luserton, d’on bruto can.

Le bestiolete col osamento del Pipetta, se la ga fiocada par la più curta. Nanetto ga pensà:
- I macachi i guasta la gran parte del tempo inserca de magnar. I ghe piase i pignui, le panoce e anca le manane. Alora, mi ghe vao drio in scondion, e quando i cata calcossa de magnar, li obrigo a spatir co mi. Re, re, re…. Cossita i macachi via par le piante fando strèpito, e Pipetta via par in medo le corde e roete, in mudande, co la speransa de copar la fame.

Sorte che le bèstie le fava tanto bacan, senò Nanetto li gavaria persi e babao pignui.

I macachi, pensava Nanetto, i zera de pansa piena, parché i se fermava spesso par dugar. I saltava, i osava e po, zera fin gusto de vardarli.
- Se fusse de pansa piena anca mi saltaria de gusto!

Finalmente, i macachi i ze vegnisti do dele piante, e più rente tera, i se mete magnar more negre. Ghenera on spropòsito.

Nanetto se vicina pianpianelo e co l’è stà a puchi metri l’à piantà via na pi bruta osada che le póvere bèstie le se ga molà via par le piante co tanta paura, scuasi come lu quando se la ga tolta dei bùlgheri el giorno vanti.

Nanetto no à perso tempo; el ga magnà na spansada de more, cose de tocarle in gola col deo.

El sole se fava a un quarto de caminada, ga scomissià scaldar un fià. Nanetto se instrada verso el so cùcio par via de torse la roba e anca méterse le gosse in récia e bever el remèdio del dotore. Vanti rivar te la grutina, on fredo mortal ghe ga coresto te’l filon dea schena. L’à scoltà i simioti che fava festa. El à pensà:
- La me camisa e le me braghe! Ghe la gaveva tocà nantra volta a ani indrio.

Co l’è rivà, el cerca le robe. No le vede. Me par da verle picade qua, me par de verle picade là, e gnente. El pedo che i remèdii i zera in scarsela dele braghe. I simioti, quele bèstie de mato, i ze drio darme el truco del spauron che ghe go dato.

 

Sergio Angelo Grando
Email: sergio.grando@terra.com.br

 

Scrivi commento

Commenti: 0