Nanetto Pipetta – Sergio Angelo Grando – Porto Alegre – RS
Drio man che’l mato zera taià, el fogo netava la tera, e el mìlio zera piantà. Matia e tuti i coloni doperava el mìlio par la polenta e soratuto par guarnar i porchi, che zera l’ùnica maniera de ciapar calche soldo de bona mesura.
Alora, cossita, tea Fazenda de Matia, te’l istà, co zera seco, i laorava in meso el mato e anca i piantava e snetava mìlio. De maio a setembre, che zera più frescheto, i catava su el mìlio, i ingordava i porchi, e te’l posto del mìlio, i semenava formento, la maioransa querto co la sapa, parché le tere descòmode no le assava possibilità de doperar el badilon.
Posted by Talian Brasil on 29/06/2011
O i porchi zera prunti, li menava al frigorìfico de Monte Véneto. Come zera darentin, e na mùcia al colpo, invesse farli sofrir co quela de carga e descarga, i li menava in trupa. Prima da instradarli, li assava medo giorno e na note sensa magnar. Prima, parché i se curese fora e, dopo, parché i obedisse meio durante la caminada. Nanetto davanti co do quarte de mìlio in schena, el ndava trando zo grani. I porchi co fame i ghe ndava drio sensa tante serimònie. On paro de peuni i camivava dele bande, e nantro te’l fin dela trupa. La careta vegnea dadrio, par via de che, se qualche mas-cio se stufasse, o se fesse dal mal, i lo cargava e i lo menava insieme.
Nanetto zera pràtico de far quel lavoro. Lo gaveva fato belche in tanti altri posti in te le so caminade Rio Grande in fora. Na volta el à giutà parar na trupa del Maragata fin al Bassan. I zera darente dosento porchi de diversi paruni. Ze stà più na festa che on laoro.
Ma, dele volte, ndava mia pròpio tuto de acordo. Qualche scavessoto più magro e ligero, el se piantava in testa de fiocàrsela. El se instrodava via pal mato e chi che lo cata ncora?
Alora quei dela careta i se fermava e i ghe parava drio i can, e i lo menava in strada e i lo sgiaventava su la careta, sia stà vivo, meio sia stà morto. In prima, no’l incomodava più, dopo zera carne bona, e taola piena.
Rivadi al frigorìfico, i porchi i zera pesai, e dopo i zera mesturai a tanti altri, de tanti contandini e i spetava el so destin …
Tel ritorno, Nanetto ghe parla a Gnagno:
- Savio, sior Gnagno, che ze tanto tempo che no vedo la me morosa. Ze meio che vaga véderla e darghe na man a Àndolo, so popà, che par mi ze come fusse el mio pròpio genitor. Ze stà lu che me ga giutà sempre che me ga ocoresto.
- Si, te fè ben, ghe risponde Gnagno. Ze cossita pròpio che se fa. Mai desmentegarse dei più veci e gnanca de coei che ne à fato carità. Ze come dise el provèrbio: “Co na man se lava quelaltra”e el resto te lo sè.
El giorno drio, bonora, co quatro schei in scarsela, prodoto del so lavoro e el fagotin su le spale, Nanetto tornava al so gnaro originale, come i osei migratòrii. I zola pal celo de tuto’l mondo, ma, on giorno i ritorna sempre al so cùcio, come femo tuti nantri, co la gràssia del bon Signor Dio.
Sergio Angelo Grando
Email: sergio.grando@terra.com.br
Scrivi commento