Nanetto Pipetta -Sergio Angelo Grando – Porto Alegre – RS
Ze rivà ora de taiar formento. Nanetto e la zia Marieta ze ndai catar corde de mato par ligar le faie. El nono Angelin el ga batesto le làmine dele sésole co la pianta de fero e martel, come el fava cola falde. I sesoliti li à gusai tea mola de sasso e dopo tirà el fil cola pietra. El zio Toni parava la mola, e el nono gusava.
Posted by Talian Brasil on 05/06/2011
El zio Toni, come lo ò bele dito, el gaveva la so mesa colònia, ma, tanti lauri e rosse le zera fate insieme. I vignai i zera tendisti insieme, e dopo i spartia l’ua, e cadauno fava el so vin, dela maniera che’l volea. El formento zera piantà insieme e anca qualche rossa de mìlio, quando la tera l’era distante, o descòmoda. Tera questa, che se podeva far rossa solo a sapa. El badilon no adiantava gnente, parché zera massa sassi e la riva tanto granda che i boi no se tegnea su tel solco. Se pol dir che i sbari de mìlio i vegneva su in medo i sassi, onde zera qualche postesel de meter i grani tea tera. Ma, come la tera zera bona; tera de mato, i racolti sempre zera buni e compensava le fadighe, soratuto co vegneva l’ora de catarlo su. Ma, co tanta riva e tanti sassi, el mìlio zera portà fora in spale fin tea careta che zera messa zo tel pian. Co la distansa zera massa granda, el mìlio vegneva fora dea rossa a carghiero.
Dopo fenio gusar i strumenti, el zio Toni à tacà i boi tea careta par menar zo in colònia le strope e tel ritorno menar casa na caretada de legna de angico. Tei giorni de piova, co no dava par far altro, i segava la legna a borei, e la meteva soto la branda al querto par dopararla tel inverno.
Intanto quela, ze rivà la zia, e Nanetto, co on fasso de corde cadauno. El nono à carga anca do fassi de strope longhe e grosse, quele
che no ze stà doperade par ligar le vigne. El zio ghe dise a Nanetto:
– Te vè zo cola careta, che mi, vanti vegner zo, passo casa e me tolo su la me sésola. Cossita, se càpita qualchedun giutarme, ghemo na sésola de vanso. Invito anca me dona e me fiola Odila. Fin
mesodì le pol vegner anca ele, visto che la Alvanì la ze in scola. Te racomando che tel ndar in zo te mini i boi. Ze na giuntina domada da poco. No i ze tanto obedienti. I ze ncora duri de
récia.
La zia Marieta ghe dise a so fradel:
– Toni, vegno zo casa anca mi. Cossita vago insieme dela Màbile e la Odila. Ndemo siacolando, intanto…
Nanetto se parte, ma, co ze stà fora de soto i oci de tuti, el salta insima la careta e el para i boi de ligera.
Par ndar in fondo la colònia, bisognava passar davanti la casa de Luis (Gìgio) Santoro. Pena dopo la casa, zera la stala e el paiaro.
Là intorno, Gìgio gavea sempre on paro de sami de ave rento i cassuni. El zera là drio alsar la tampa de na cassa par veder se la gaveva miel. Le ave zera furiose. Scoltanto el bacan dea careta, on poche se mete drio i boi.
In prima i à dato on paro de scoade cola coa par pararle via, ma, me digo che qualcheduna ghe ze ndà rento par la récia de on boi, e questo se mete a sgorlar la testa e corer. Quelaltro el se spaura e el se mola anca lu.
Nanetto se sfronta tel casson dea careta e el tira le rèdene par fermarli osando:
– Oa, Bonito! Fermo Nàpoli!
Ma, i boi, desesperai co le ave drio, i coreva sempre depiù. La careta fava on bacan del diàvolo sgorlando cadene. Nanetto, vedéndola bruta, el mola le rèdene e el salta zo come el ga podesto. La sorte che’l ze cascà co a testa insima on gnaro de formiguni.
Se’l gavesse cascà on palmo più a la drita, el se gavaria spacà i sarvei su par on sasso de ponta.
Sorte, anca, parché, pena devanti, la strada fava na volta seca. I boi ga fato la volta polito, ma la careta se à sgiaventà tel baranco e la ze restada a tochi.
Na ora dopo, i ga catà i boi. Uno solo co on toco de soga tei corni. Quelaltro cola canga ncora picada e on toco de timon dea careta.
Sergio Angelo Grando
Email: sergio.grando@terra.com.br
Scrivi commento