El gal rauco monta el so circo

Nanetto Pipetta - Sergio Angelo Grando – Porto Alegre – RS

Luni de matina, Àngelo se desmìssia bonora. Vanti le sinque. El ga pensà: ze ncora scuro. Stago qua soto le querte nantra s-ciantineta e digo su al manco on diese ave-marie. Quando zera a metà, el scolta on gal che canta, ma nò banda la capunara. L’è stà atento e el gal canta nantra volta, ma de na maniera strània, come s’el fusse rauco. Passà nantro tocheto de tempo, el canta nantra volta, ma desso el se ga incrucà, el à tacà tossir.

- Ostamenta, el dise contra la Pina, quel no ze un gal, ne qua e ne in Roma. Ze Nanetto Pipetta drio proar torne in giro.

Come Àngelo, i altri abitanti dea casa i ga scoltà anca luri el cìrco che’l gal rauco à montà.

In puchi menuti la fameia intiera zera in cosina drio el fogon. I ridea contenti col gal rauco.

Intanto che’l aqua scaldava tea salera de fero, i tusi che imparava cosir co Pino, i se ga messo a pareciar quel che ocorea par laorar durante quel giorno. Uno metea bronse tel fero de sopresar, nantro l’è ndà scoar la sala e el terso, onder le Nanetto Pipetta - Sergio Angelo Grando – Porto Alegre – RS

Luni de matina, Àngelo se desmìssia bonora. Vanti le sinque. El ga pensà: ze ncora scuro. Stago qua soto le querte nantra s-ciantineta e digo su al manco on diese ave-marie. Quando zera a metà, el scolta on gal che canta, ma nò banda la capunara. L’è stà atento e el gal canta nantra volta, ma de na maniera strània, come s’el fusse rauco. Passà nantro tocheto de tempo, el canta nantra volta, ma desso el se ga incrucà, el à tacà tossir.

màchine de cosir.

Intanto la siapa del fogon che la zera calda sufissientemente ze stata querta de fete de polenta par brustolar.

Co la prima feta à tocà la siapa, la ga fato bacan tanto forte come le budele de Nanetto Pipetta. El poverin gaveva tanta fame. La nona

Pina à verto el fornelo del fogon e la ga tirà fora sete patate grosse e ben cosinade. Nanetto e anca i altri i à spalancà i oci. Tuti ghe piaseva le patate dolse. Tanti, de più de magnar pan e salame, o sinò polenta e formaio.

El nono Angelin el fava diferente. A la matina, squasi sempre, el bevea solo na cìcara de cafè negro e dopo el toleva su la sapa in schena e ndava in colònia. Là par le diese, qualchedun ghe portava la colassion te na sesta de strope. Pan, salame, fortaia e polenta brustolada. Tel posto del cafè, na garafa de vin negro fato co le so man e la so siensa.

La pràtica zera tanto bona che daromai tuti fava come el nono. I spetava la colassion in colònia. Àngelo no lo à mai dito, ma el pensava. I me beve fora tuto el vin. No’l me basta fin che vien quel novo. L’ano che vien bisogna che ghen faga el dópio. Al manco tre mila e chignento litri. Far manco graspa e far più vin pìcolo. Intanto che quel bon se staiona, bevemo el vin pìcolo. Cossita el me dura l’ano intiero.

Quela matina, intanto ze stà fato colassion in tola. Tra ridade e ciàcole, on panaro de polenta, na dùsia de ovi, due salami, due ciope de pan, meda pessa de formaio e le sete patate ze ndate a malora in puchi sgagnuni. La Marcolina se stimava, parché tuti magnava tanto e de gusto. La pensava coi so botuni, che’l so magnar zera bon, parché se no’l fusse, qualche volta ghen vansaria.

Drioman che cadauno fenia de magnar, se instradava drio el so laoro. Àngelo, Nanetto e la zia Marieta i ga ciapà le sape, trate su tea careta, incangà i boi e i ze ndati zo in fondo la colònia snetar peste in medo el mìlio. La sera, quando i ritornava, i boi zera passui e la careta carga de sbari de mìlio scartai durante el laoro. Qualche busa gaveva anca sei o sete gambare, parché tel ora de piantarlo la màchina zera mal regulada. Bisognava assàrghene solo tre o quatro. Cossita le più strasse servia de magnar a le vache de late. Par sora ste canete, na mùcia de sbari de radici pissacan.

Pino e i tusi che imparava cosir: Celeste Marinello, Santin Calza, Ulisses Frison, fradel dela Mcolina e João Frison (Joanin del Moro), primo cosin dea Marcolina, i ze ndati drio ai so afari.

La nona Pina, seconda dona del nono Angelin, rincurava el Celito de puchi misi, squasi sempre infassà e butà tea cuneta e la Odete co quatro ani. El Nene de sei o sete ani, solo pensava far caretini cole rodete de bòtoli e córerghe drio ai ciut, le séleghe e cinciorinci co na fionda che la gaveva la mira storta parché no’l ghen copava mai.

La Marcolina se à messo presto far el disnar, par, vedemo quanti: quatro che imparava cosir, più Pino. El nono Àngelo e la Nona Pina, ela pròpia, mama dei putei. La zia Marieta, Nanetto e almanco ghen zera sempre due o tre de quei che vegneva farse far roba. El pareva che i fesse a posta, parché i capitava sempre de medo dì. E la Marcolina no assava gnensuni ndar via sensa un bocon de magnar.

Lora, se fusse contarli polito pròpio, i zera almanco on dódese, col Nene, parché poca età, no vol mia dir poco petito.
Prima la ghe à tira el col a on gal rosso de on quatro chili. La se ga ricordà del gal rauco e la à ridesto. Lo à pelà e snetà, vanti picarlo al vento par sugarse. La à messo i fasui insima el fogo par cosinar te na pignata de fero, visto che i zera stati belche curai a la sera vanti.

Dopo l’à impastà el pan. Par menarlo l’à ciamà Ulisses, so fradel, visto che’l zera on omo forte. Intanto ela ze ndata pilonar on caneco de riso e dopo l’à fato le taiadele. El pan riposava e levava. Dopo, coresta impiar el fogo tel forno via soto la brandeta.
Zera belche le diese e el sol scomissiava scaldar.

Co zera rente mesodì, i à messo el Nene a caval del cavalin petisso par portarghe el disnar a quei che passava peste zo rente el Rio Sapato.

Col carghiero, on seston par banda e rento el magnar, no ghe zera maniera de ndar in malora, tanto el disnar come el Nene.

Sergio Angelo Grando
Email: sergio.grando@terra.com.br