El ga qualque parafuso fora de posto

Nanetto Pipetta – Sergio Angelo Grando – Porto Alegre – RS

 

Dopo quel incidente de voler soferar lu solo, Nanetto, par in tanto, no’l se ga più fidà de frugnarghe drio al camignon. In tanto, con passiensa e tante fermade parché la màchina del camignon la se sfredasse, i do viaianti i se tirava verso Alfredo Chaves e Capoera.

Le strade, le giutava poco. Piene de busi e storte come el ano de la pelagra, le pareva el trodo de ndar al inferno.

-Seto, Génio, dise Nanetto, se ghe fusse stradini de brasso bon come zera mi co laorava a Santa Teresa, ste strade le saria tanto meio.

-Valà, valà, Nanetto, se te fussi stà tanto bon cossita, le strade de Santa Teresa le saria meio de queste; sucede che le ze come queste o anca pedo.

Te quela, i scolta on pi bruto de on s-cioco, come fusse stà un tiro de rivolver, o na saeta curta e drita.

- On penel, dise Génio, ben ciapadi, e incora par sora la piova che se vicina e el camignon riva in su.

-Cosa ze stà coi penèi? Domanda Nanetto corioso.

-S-ciocà, po…, dise Génio, passando le man par la piassa de la so testa.

- Gheto visto, Génio, se te me gavissi scoltà ncora tel tempo che te gavevi la camignoneta vècia, te gavarissi sostituìo ste rode de goma par rode de careton. Te pol esser securo che quele no le se sbusava mai.

- Tasi su, purgante, oio de rìssino rovinà, osa Génio, pien de ràbia e col fiel che ghe vegnea fora par la boca. Invesse de star là ciaciarar robe inùtile, vien qua giutarme. Ciapa on macaco e mételo soto el sostegno de le rode de drio a la parte drita. Ma vanti, meti soto on calso de sasso.

E Nanetto:

-La cugna sarà anca fàcile de meter soto le rode, ma ndove ndarò ciapar on macaco? intrà che i ze ciari e dopo i se ga tornà spaìsighi, par via che i ga tanta paura de le s-ciopetade. Mi no savaria gnanca come far, seto Génio!

Intanto quela, Nanetto meteva soto le rode quatro sasseti on poco pi grossi che on ovo de galina.

-Pi grossi, insulso, osava Génio, e no te vidi che semo riva in su, nò méterli devanti, i va dedrio, ciò, mato che te si! A te ghè pròpio mancansa de sal in suca o qualche parafuso fora de posto. Pol mia esser…o sito drio tirarme in giro?

 

Sergio Angelo Grando
Email: sergio.grando@terra.com.br

Scrivi commento

Commenti: 0