Cìciole a volontà

Nanetto Pipetta – Sergio Angelo Grando – Porto Alegre – RS

 

Co tuti quei pessi par rostir, i ga destinà copar el porco. Come in tute le fameie, el di de copar el porco zera na ocasion de festa. La saria stata la più granda, se no fusse el giorno che vegnea la màchina de bater el formento. El tempo se avea invià par piover; e co piove l’è meio copar el porco, parché ghe ze manco mosche in torno.

La sera vanti, Nanetto e Làrio i à gusà le fache co la mola e dopo passà la pria, de na maniera che’l fil taiava anca i pensieri.

Le tose, le ga netà la cantina, la tola de spartir el porco, metesto tuto a posto, tuto neto, providensià pévero, canela; le budele, comprae da Gazzana, meteste te’l aseo. La Graciosa ga fato el pan te’l forno de legna.

Tito l’à parecià la staliera, lavà el brondo co la lìssia, messo al querto legna de angico e snetà el staloto ndove ghe zera el porco, par catarlo più neto a la matina.

Tuti intafarai come le ave co le ze drio samar. Tuti, contenti, parché, el giorno drio, come lo ò bel dito, zera giorno de festa. Carne a volontà, cìciole e, po, zera gnanca da pensarghe sora, tanto che la boca se impienia de aqua.
Riva matina e el tempo tuto nuvolà.
- Bel giorno de copar el porco, dise Gìgio, intanto che’l beve on giosso de cafè negro. La colassion vegnea più tardi, oncò special, coi rognuni, col cor del porsel e con pan fresco.

Le tose le ze ndate in stala molder, la Graciosa guarnar le bèstie, trarghe el mìlio a le galine e pastà ai pitussei. I omi i se à tacà drio el porco.

Nanetto e Làrio i ze saltai rento te’l staloto, e lo ga brincà par le rece e i lo ga rastà fora e trato in tera co le gambe alte.
Nanetto osava:
- No te giova sigar, porcheto veio! Te femo la foia. Ze meio che te muri de na volta, cossita no te sofri tanto come quando te portavi la canàola al col.

Gìgio ghe ze ndato a dosso e metesto la faca soto na gamba de vanti e diressionà al centro del peto. L’istrumento ga sbusà el cuore, e el porco no ga dato gnanca na sigada. Ga dato na tremadina e no’l se à più movesto.

I lo à trato su la cariola e menà soto la branda dela careta onde l’aqua zera drio boier. In vinti menuti, i lo gavea pelà, verto e menà in cantina. I lo ga picà par sfredarse la carne e anca par sgosarse zo.

Intanto quela, Tito l’avea fato on fogheto e rostio i due rognuni, el cuore e anca na lesca de carne. I à fato la colassion coi miudi del porco e pan novo. Gìgio e Làrio i à bevesto on bicer de vin, e i altri cafè col late.

L’ora de far i salami, la bagna, le cìciole. Nanetto le cognossea come grépole. Prima de tuto, Gìgio l’a scieldesto la carne pai salami. Nanetto à tirà via la bagna del coro del porco, meno quatro bei tochi de panseta. La bagna ndava te’l brondo par boier, e el coro zera masenà par far le luàneghe. La Graciosa taiava on paro de tochi de carne par Tito portarli ai vicini.

Ze costume, co se copa na bèstia, dàrghene on toco a cada vicin. Ze par mostrar la grande messìssia che i zera degni.

Quando, però, i vicini copava luri, i fava la medèsima delicatessa. Cossita, na volta ogni tanto, tuti i magnava carne fresca.

Come no ghe zera maniera de mantegner carne fresca col gelo come adesso, la solussion zera far salami, siarca, sfumegarla o méterla, dopo cosinada, soto la bagna te le late de petròlio nete.

Oio bon, el zera massa caro. Zera solo doperà par i malai. Cossita la bagna la zera tanto, o più nòbile che la carne. Co la bagna dela panceta e le grépole se consa i radici. La bagna serve par rostir, par le carne in ùmido e par na infinità de doperamenti, come farghe i pesti de bonmaistro ale bèstie che no rumegava polito.

A le sei a la sera, el porco zera fato su e, a le oto, tuti senando costelete de porco rostie, radici pissa-can, poentina dala, mangiocheta fresca e on bussoloto gaiardo de vin bresilian.

 

Sergio Angelo Grando
Email: sergio.grando@terra.com.br

Scrivi commento

Commenti: 0